$ 68.12 - 68.36
€ 78.75 - 79.87

Бензиндин баасы 40 сомдон ашты

377 0



Кыргызстанда күйүүчү май кымбаттап баратат. 27-ноябрга карата "Газпром" май куюучу бекеттеринде АИ-92 үлгүсүндөгү бензиндин литри Бишкекте 40 сом 60 тыйындан сатылууда. Ал эми АИ-95 үлгүсүндөгү күйүүчү майдын литри 43 сом 50 тыйын деп белгиленди.

Кыргызстандын Мунай сатуучулар бирикмесинин төрагасы Улан Кулов “Азаттыкка” айтканына караганда, негизинен дизель май кымбаттаганы байкалууда, себеби Кыргызстанга ноябрь айынан баштап дизель майы кошумча бажы төлөмү менен кирип жатат.

- Кыргызстанга жыл сайын 490 миң тонна дизелдик отунду бажы төлөмү жок алып кирүүгө лимит берилген. Биз бул лимитти ноябрда эле коротуп койдук. Ошондуктан азыр дизель майы тоннасына 28,80 доллар кошумча төлөм менен кирип жатат.

Улан Кулов бензиндин кымбатташын Орусиянын мунайды кайра иштетүүчү заводдорунда баа көтөрүлгөнү менен түшүндүрүүдө. Нефтетрейдерлер баалар декабрь айында кандай болорун алдын-ала айта албастыгын маалымдашты. Учурда дизель майынын литри 38 сом 50 тыйындан сатылууда.

25-ноябрда премьер-министр Сапар Исаков баалар негизсиз жогорулап жатканын айтып, Монополияга каршы жөнгө салуу агенттигине баалардын өсүшүнө бөгөт коюуну тапшырган.

Булак: Азаттык

Комментариев пока нет, добавьте свой!

Ваш аватар
  




-->